सिटीपोष्ट
काठमाडौँ, १० मङ्सिर । विभागिय टोली नेपाल पुलिसका अपोजिट स्पाइकर रविन चन्द ठकुरीले टिप टप हेल्प नेपाल स्पोर्ट्स क्लबबाट खेल्ने भएका छन् ।
यसै महिना नेपालमा हुने काभा क्लब च्याम्पियनसिप भलिबल प्रतियोगिताको लागि हेल्प नेपालले रविनलाई टोलीमा भित्र्याएको आफ्नो सामजिक सन्जालमार्फत शनिवार जानकारी दिएको छ ।
हेल्प नेपाल आठौं प्रधानमन्त्री कप एनभिए लिग च्याम्पियन बनेको थियो। विजेता हेल्प नेपाल र उपविजेता गण्डकी प्रदेशले नेपालको प्रतिनिधित्व गर्दै काभा क्लब च्याम्पियनसिप खेल्दै छन् ।
मंगलवार आठौं प्रधानमन्त्री कप एनभिए लिगमा हेल्प नेपाललाई च्याम्पियन बनाएका कप्तान दीपक थापालाई कप्तानीमा निरन्तरता दिएको थियो । हेल्प नेपालले मुख्य प्रशिक्षकमा उत्सव खड्कालाई निरन्तरता दिएको सोमवार जानकारी दिएको थियो।
काभाको कार्यक्रम अनुसार नेपाल भलिबल संघको आयोजनामा मंसिर २२ गते देखि २९ गते सम्म त्रिपुरेश्वरस्थित राष्ट्रिय खेलकुद परिषद् (राखेप)को कभर्ड हलमा हुनेछ।
क्लब च्याम्पियनसिपमा सेन्ट्रल एसियाका विभिन्न राष्ट्रका च्याम्पियन टोलीहरुले प्रतिस्पर्धा गर्नेछन् । नेपालबाट भने आयोजक राष्ट्र भएका कारण २ क्लबले सहभागिता जनाउने पक्का भएको हो ।
प्रतिक्रिया दिनुहोस्