सिटीपोष्ट
काठमाडौँ, ७ मङिसर । (शुक्रबार) आजबाट प्रदर्शनमा आउन लागेको फिल्म ‘तेल भिसा’ले पर्याप्त शो पाएको छ । फिल्मलाई मल्टीप्लेक्सहरुले राम्रो शो उपलब्ध गराएका छन् । बिहीबार दिउँसो १२ बजेसम्म फिल्मले देशभर १ सय ३० हाराहारी शो पाएको देखिन्छ । देशकै सबैभन्दा ठूलो मल्टीप्लेक्स चेन क्यूएफएक्सले मात्र देशभरका १० वटा हलमा गरी कूल ५० शो दिएको छ । त्यस्तै, दोस्रो ठूलो मल्टीप्लेक्स चेन आइएनआई सिनेमाजले ९ शो उपलब्ध गराएको छ ।
काठमाडौंमा सञ्चालित वान सिनेमाजले नयाँ बानेश्वर र कालिमाटी हलमा गरी ७ शो, एफक्युबले ६ शो, बिग मूभिज र सिने डी सेफले समान ४÷४ शो, बिएसआर मुभिज र सिके सिनेमाजले समान ३÷३ शो, रञ्जना सिनेप्लेक्सले ५ शो र कीर्तिपुर सिनेप्लेक्सले १ शो दिएका छन् । पोखरा, नेपालगञ्ज, चितवन, विराटनगर, इटहरी जस्ता सहरमा पनि फिल्मलाई राम्रो शो उपलब्ध भएको छ ।
अब प्राप्त शोलाई अकुपेन्सीमा बदल्नुपर्ने चुनौती ‘तेल भिसा’लाई रहनेछ । शुक्रबार अकुपेन्सी अनुपात ५० प्रतिशत मात्रै हुन सकेको खण्डमा पनि उपलब्ध शोबाट फिल्मले ८० लाखमाथिको ओपनिङ गर्न सक्छ । र, शनिबारका लागि शोमा पनि वृद्धि हुनेछ । बिहीबार दिउँसोसम्म काठमाडौंका केही हलमा फिल्मको टिकट बुकिङ राम्रो देखिन्छ । अब ‘डोलसेल’ महत्त्वपूर्ण छ ।
शंकर घिमिरेको निर्देशन रहेको फिल्ममा अभिनेता विपिन कार्की दोहोरो भूमिकामा छन् । उनलाई बाबु र छोराको भूमिकामा देख्न सकिनेछ । उनीसहित फिल्ममा वर्षा राउत, पुजा चन्द, ऋचा घिमिरे, बुद्धि तामाङ, सुचित्रा उप्रेती लगायतको अभिनय छ । आफ्नो छोराको सन्तान हुन लागेपछि नेपालबाट अमेरिका पुगेकी आमाले भोग्नुपरेको कानुनी झमेलाको कथामा फिल्म बनेको ट्रेलरले प्रष्ट पारिसकेको छ । फिल्ममा समावेश ‘कति रमाइलो’ गीत यतिबेला चर्चामा छ ।
तिहारको लक्ष्मीपूजाबाट प्रदर्शनमा आएको फिल्म ‘पूर्ण बहादुरको सारङ्गी’को अझै पनि हलमा पकड कमजोर बनेको छैन । कामकाजी दिनमा समेत ७० प्रतिशतसम्म अकुपेन्सी हासिल गरिरहेको छ । यसैले शो पनि धेरैजसो यसैको कब्जामा छ । गत साता प्रदर्शनमा आएको ‘ह्रस्व दीर्घ’ले पनि राम्रो व्यापार गरिरहेको छ ।
प्रतिक्रिया दिनुहोस्