गलेश्वर (म्याग्दी), १५ साउन ः वर्र्षौदेखि खानेपानीको समस्या झल्दै आएका म्याग्दीको बेनी नगरपालिका–२ बगरफाँटका बासिन्दा गाउँमा ‘एक घर, एक धारा’सहितको खानेपानी आयोजना निर्माण भएपछि खुसी भएका छन् ।
सङ्घीय खानेपानी तथा ढल व्यवस्थापन आयोजनाको सहयोगमा उपभोक्ता समितिले निर्माण गरेको ‘एक घर, एक धारा’ खानेपानी आयोजनाबाट घर–घरमा खानेपानीको सुविधा पुगेपछि पानी लिनका लागि कुवा र खोलामा धाउने समस्याबाट यहाँका बासिन्दा मुक्त भएका हुन् । आयोजनाबाट गाउँका दुई सय पाँच परिवार लाभान्वित भएका छन् ।
सङ्घीय सरकारको रु एक करोड ४४ लाख ७५ हजार एक सय १२ सहयोगमा गाउँमा खानेपानी आयोजना निर्माण भएको उपभोक्ता समितिका अध्यक्ष दीपक मल्लले जानकारी दिनुभयो । “कोप्रे, बाङगेरा र लहरेनीको मुहानमा ‘इन्टेक’ बनाएर ल्याएको पानी ५०–५० हजार लिटर क्षमताको तीन रिजर्भ ट्याङ्कीमा सङ्कलन गरी वितरण गर्न थालिएको छ”, उहाँले भन्नुभयो, “संरचना निर्माणको काम सकिएपछि दुई सय पाँच घरमा मिटरसहित जडान भएका धारामा पानी वितरण गरेका छौँ ।”
गाउँमा खानेपानीका लागि दिनहुँ झगडा हुने गरेको उहाँले स्मरण गर्नुभयो । “एउटै धारोमा आठ÷दश घरले पाइप जोडेर घरघरमा पानी लैजान पालो कुर्नुपर्दथ्यो, अब ढुक्कसँग खानेपानी उपभोग गर्न पाइने भएको छ”, स्थानीय उपभोक्ता विजय थापाले भन्नुभयो । परीक्षणका क्रममा देखिएका प्राविधिक समस्या समाधान र सुधार गरेर नियमित पानी वितरण गरिएको अध्यक्ष मल्लले बताउनुभयो ।
पाँच हजार दुई सय ७१ मिटर मुख्य र पाँच हजार पाँच सय ४७ मिटर वितरण पाइप लाइन निर्माण भएको छ । आयोजना निर्माणका लागि आव २०७९÷८० मा रु ५३ लाख ११ हजार आठ सय ५२ र २०८०÷८१ रु ९१ लाख ६३ हजार दुई सय ६० खर्च भएको सङ्घीय खानेपानी तथा ढल व्यवस्थापन आयोजनाका सब इञ्जिनियर सुनिलसिंह बोहोराले बताउनुभयो ।
उपभोक्ता समितिले कूल लागतको १० प्रतिशत बराबरको श्रमदान गरेका छन् । यसअघि बगरफाँटमा २१ सार्वजनिक धारामार्फत खानेपानी वितरण हुने गरेको थियो । सार्वजनिक धाराबाट गाग्री, ग्यालिन र ड्रममा ओसार्ने तथा पाइप जडान गरेर घरघरमा पानी लगेर उपभोग गर्ने गरेका थिए ।
खानेपानी नियमित सञ्चालन गर्नका लागि एक कर्मचारी नियुक्त गर्ने र आयोजनाको दिगो व्यवस्थापनका लागि महसुल निर्धारण गर्ने तयारी भइरहेको बगरफाँट खानेपानी उपभोक्ता समितिका सचिव चन्द्रबहादुर घिमिरेले बताउनुभयो ।
शिरानमा विशाल पहरो र पुछारमा म्याग्दी नदी रहेको बगरफाँट गाउँ म्याग्दीको सदरमुकाम बेनीबजार नजिकै रहेको गाउँ हो । अरु सबै सुविधा र विकासका पूर्वाधार भएको यस गाउँमा खानेपानीको समस्याकै कारण कतिपय व्यक्ति बसाइँसराइ गरेर अन्यत्र जाने गरेका थिए । अब खानेपानीको सुविधा प्रत्येक घरघरमा पुगेपछि बसाइँसराइको समस्या पनि नियन्त्रण हुने स्थानीयले बताएका छन् ।
–––
सिटीपोष्ट
प्रतिक्रिया दिनुहोस्