प्रमुख प्रतिपक्ष नेकपा एमालेद्वारा प्रतिनिधिसभा अवरोध, सदन सञ्चालनलाई सहज बनाउन प्रधानमन्त्री देउवाको आग्रह

काठमाडौँ, २४ भदौ । प्रमुख प्रतिपक्ष नेकपा (एमाले)ले सङ्घीय संसद्को नवौँ अधिवेशन सुरु भएसँगै अवरोध गरेको छ । प्रतिनिधिसभाका सभामुख अग्निप्रसाद सापकोटाले बैठक आरम्भ भएपछि राष्ट्रपतिबाट अधिवेशन आह्वानसम्बन्धी पत्रको व्यहोरा पढेर अधिवेशन प्रारम्भका अवसरमा सांसदलाई स्वागत गरेपछि प्रमुख प्रतिपक्ष नेकपा (एमाले) का सांसदहरूले आफ्नो स्थानबाट उठेर अवरोध गरेका हुन् ।
सभामुख सापकोटाले पहिलो बैठकमा स्वागत गर्न नपाउँदै अवरोध नगर्न आग्रह गर्दै एमालेका प्रमुख सचेतक विशाल भट्टराईलाई बोल्न दिए । प्रमुख सतेचक भट्टराईले एमालेले कारबाहीका लागि सिफारिश गरेका १४ जना सांसदलाई कारबाही नगरेको भन्दै विरोध जनाए । उनले विगतमा अन्य दलका कारबाहीको सिफारिशलाई तत्कालै सूचना प्रकाशन गरिएको तर एमालेको सिफारिशलाई विचाराधीनमा राखेर दल विभाजन भइसकेपछि कारबाही गर्न नपर्ने निर्णय गरेर भन्दै सदनको कारबाही चल्न नदिने घोषणा गरे ।
सांसदहरूले विधिको शासन कायम गर्न, संसदीय सर्वाेच्चता कायम गर्न माग गरे । सभामुख सापकोटाले मुलुकको संविधान र कानून तथा संसद्को मर्यादा र परम्पराभन्दा बाहिर नजान आग्रह गर्दै आफूले प्रतिनिधिसभाको नियमावलीबमोजिम नै काम गरेको जिकिर गरे । त्यसपछि सभामुख साकोटाले १५ मिनेटका लागि बैठक स्थगन गरे ।
बुधबारको बैठकमा सभामुखको अनुस्थितिमा बैठकमा अध्यक्षता गर्ने सदस्यको मनोनयन गर्ने, बैठकमा गृहमन्त्री बालकृष्ण खाँणले ‘राजनीतिक दलसम्बन्धी (दोस्रो संशोधन) अध्यादेश, २०७८ पेश गर्नेलगायत सम्भावित कार्यसूची छ । यस्तै नेपाल नागरिकता (पहिलो संशोधन) अध्यादेश, २०७८’, आर्थिक अध्यादेश, २०७८’, विनियोजन अध्यादेश, २०७८, ‘राष्ट्र ऋण उठाउने अध्यादेश, २०७८’ ‘शपथसम्बन्धी अध्यादेश, २०७८’, ‘रेल्वे सम्बन्धी अध्यादेश, २०७८’, ‘औषधि (तेस्रो संशोधन) अध्यादेश, २०७८’ लाई स्वकृतिका लागि पेश गर्ने, ‘कोभिड–१९ सङ्कट व्यवस्थापन अध्यादेश, २०७८’, ‘स्वास्थ्यकर्मी तथा स्वास्थ्य संस्थाको सुरक्षासम्बन्धी अध्यादेश, २०७८’, ‘सामाजिक सुरक्षासम्बन्धी (पहिलो संशोधन) अध्यादेश, २०७८’ स्वीकृतिका लागि पेश गरिने कार्यसूची छ ।
यसैगरी, राष्ट्रियसभाको दशौँ अधिवेशन सुरु भएको छ । राष्ट्रियसभा अध्यक्ष गणेशप्रसाद तिमिल्सिनाले बैठक सुरु गर्दै सबै सदस्यलाई स्वागत गरे ।
सरकारको सिफारिशमा राष्ट्रपति विद्यादेवी भण्डारीबाट आह्वान भएअनुरूप संसद्को अधिवेशन सुरु भएको हो ।बैठकको प्रारम्भमा अध्यक्ष तिमिल्सिनाले अधिवेशन आह्वानसम्बन्धी राष्ट्रपति कार्यालयबाट प्राप्त पत्र वाचन गरेर सुनाए । त्यसको लगत्तै प्रतिपक्षी नेकपा (एमाले)का सांसदले उठेर विरोध जनाएपछि अध्यक्ष तिमिल्सिनाले एमालेका प्रमुख सचेतक खिमलाल भट्टराईलाई बोल्न समय दिए ।
मुख्य सचेतक भट्टराईले दार्चुला घटनामा सरकार राष्ट्रिय स्वाधीनताप्रति गम्भीर नभएको मात्र नभई आफ्ना नागरिक तुइन चँुडिएर बेपत्ता भएका घटनामा बोल्नसमेत नसकेको आरोप लगाए ।
कोरोनाले देश अस्तव्यस्त हँुदासमेत अघिल्लो सरकारले ल्याएको खोप व्यवस्थापन गरेर सरकारले जनतालाई सङ्क्रमणबाट जोगाउन नसकेको आरोप लगाउँदै नेता भट्टराईले ‘लोकतन्त्रलाई अप्ठेरो तुल्याउने ढङ्गबाट सभामुखको निर्णय’ले लोकतन्त्रलाई बलियो तुल्याउन नसक्ने बताए ।
सभामुख वकिल र न्यायाधीशको भूमिका खेल्न उद्दत भएको आरोप लगाउँदै उनले लोकतन्त्रको मूल्यमान्यतालाई खण्डित तुल्याउने भूमिकाले यसमाथि खतरा उत्पन्न भएको धारणा राखे ।
मुलुक र जनता बाढीपहिरो, डुबानका पीडामा आक्रान्त रहेका बेला सरकार एमालेलाई विभाजन गर्ने काममै सभामुख व्यस्त रहेको आरोप लगाउँदै उनले लोकतन्त्र र संविधानको संरक्षणको सुनिश्चिता नभई संसद् चल्न दिइन्न भनी उभिएर विरोध जनाए ।
अध्यक्ष तिमिल्सनाले प्रतिनिधिसभाबारे उठेका प्रश्न सोही सदनमा छलफल हुनुपर्ने जनाउँदै राष्ट्रियसभाको अलग गरिमालाई ख्याल गरेर सदन सञ्चालनमा सहयोग गर्न आग्रह गर्दा पनि एमालेका सांसदले उठेर विरोध गरिरहे । तत्पश्चात अध्यक्ष तिमिल्सनाले बैठक आधा घण्टाका लागि स्थगन भएको घोषणा गरे ।
यता, प्रधानमन्त्री शेरबहादुर देउवाले सत्तापक्ष र विपक्षी सबै मिलेर सदन चलाउनुपर्ने आवश्यकता रहेकामा जोड दिएका छन । बैठकमा उनले अन्तरवस्तुमा असहमति हुनसक्छ तर विधि, प्रक्रिया र प्रणालीमा सहमति गरेर अघि बढ्न तथा सदन सञ्चालनलाई सहज बनाउन भूमिका खेल्नका लागि सत्तागठबन्धनका नेताहरूलाई आग्रह गरेका थिए । प्रधानमन्त्री तथा मन्त्रिपरिषद्को कार्यालय सिंहदरबारमा बुधबार बसेको सत्ता गठबन्धन दलका शीर्ष नेताहरूले बैठकमा सदनमा अतिआवश्यक विधेयक विचारधिन भएकाले सत्तापक्ष र विपक्षी सबै मिलेर सदन चलाउनुपर्ने आवश्यकता रहेको बताएका हुन । बुधबारदेखि सुरु सङघीय संसद्को बैठकअघि सदन सञ्चालन गर्ने विषयमा सो बैठक बसेको नेकपा (माओवादी केन्द्र) का नेता देव गुरुङले जानकारी दिएका छन ।

Leave a Reply

Your email address will not be published. Required fields are marked *