भारतसँग जोडिएको सीमामा बिओपी स्थापना

भरतपुर, १२ असोज । चितवन जिल्लामा भारतसँग जोडिएका सीमा क्षेत्रको सुरक्षाका लागि थप दुई बोर्डर आउट पोष्ट (बिओपी) स्थापना गरिएको छ । सरकारले देशभर सीमा क्षेत्रमा सशस्त्र प्रहरीका बिओपी थप गर्ने निर्णय गरेसँगै चितवनमा पनि दुई वटा बिओपी थपेको हो । माडी नगरपालिका–९ को कान्छी बगाई र वडा नं १ को भङ्गटामा स्थापना गरिएका बिओपीको आइतबार एक कार्यक्रमकाबीच उद्घाटन गरियो । सशस्त्र बल नम्बर तीन गढिमाई बाहिनीका बाहिनीपति सशस्त्र प्रहरी नायब महानिरीक्षक मन्दीप श्रेष्ठले बिओपीको उद्घाटन गर्दै आगामी दिनमा सीमा सुरक्षा थप मजबुत् बन्ने बताए । उनले भने, “एउटा बिओपीले लामो दूरीको सुरक्षा दिनुपर्ने बाध्यता हटेको छ, सीमा रक्षामा थप कटिबद्ध हुन प्रेरित गरेको छ ।”
यसअघि चितवनको माडी नगरपालिकामा तीनवटा मात्रै बिओपी पोष्ट थिए । थपिएका दुई सँगै पाँच पोष्ट पुगेको छ । माडीमै थप एक पोष्ट स्थापना गर्ने तयारी भइरहेको प्रमुख जिल्ला अधिकारी नारायणप्रसाद भट्टराईले जानकारी दिए । यसअघि बाँदरझुला, छरछरे र बाल्मिकी आश्रममा सशस्त्रका अस्थायी पोष्ट रहेको उनले बताए । सशस्त्र प्रहरी बल १७ नं गणका प्रहरी उपरीक्षक दीपककुमार थापाले नयाँ पोष्ट १५ किलोमिटरको दूरीमा स्थापना भएको बताए । उनले भने, “पहिले तीनवटा पोष्ट ३० किलोमिटरको दूरीमा थिए, पहिलो चरणमा दुईवटा पोष्ट थपिएपछि सुरक्षा व्यवस्था मजबुत बनाउन थप मद्दत पुग्नेछ ।” उनले थपिएका पोष्टमा ३५ जनाको स्वीकृत दरबन्दी रहेको जानकारी दिए । हाललाई भने पोष्टमा २५ जना प्रहरी तैनाथ गरिएको छ । चितवन जिल्लाको भारतसँग ८८ किलोमिटर खुला सीमा जोडिएको छ । माडीमा भारतसँगको सिमाना जोडिएको अधिकांश निकुञ्ज क्षेत्र पर्छ ।

Leave a Reply

Your email address will not be published. Required fields are marked *