दिल्ली क्यापिटल्सलाइ उपाधि जिताउने सन्दीप लामिछानेको लक्ष्य

(एजेन्सी) काठमाडौं, ९ असोज । नेपाली राष्ट्रिय क्रिकेट टोलीका लेगस्पिनर सन्दीप लामिछानेले दिल्ली क्यापिटल्सलाई इन्डियन प्रिमियर लिग (आइपिएल) २०२० को उपाधि जिताउने लक्ष्य रहेको बताएका छन् । सन्दीपले दिल्ली क्यापिटल्ससँगको कुराकानीको क्रममा ट्रफी जित्ने लक्ष्य रहेको बताएका हुन् । ‘दिल्ली मेरो मुटुमा छ । मलाई आफ्नो घर जस्तो लाग्छ । दिल्लीको अभ्यास र टोलीमा फर्किंदा खुसि छु । दिल्ली र नेपाली समर्थकलाई म र मेरो टिमलाई समर्थन गर्न आग्रह गर्दछु । मैले मेरो देशबाट प्रतिनिधित्व गरि रहेको छु । म तपाईं सबै प्रति आभारी छु’, सन्दीपले भने ।‘मलाई लाग्छ यस वर्ष सुरुमा बिग ब्यास लिग खेले । त्यसपछि नेपालबाट केहि खेल खेले । अनि कोरोना महामारी सुरु भयो । त्यसपछि सिपिएल खेले । अब आइपिएल खेल्दै छु’, सन्दीपले थपे ‘आइपिएल हुँदा यसले सबैको अनुहारमा खुसी ल्याउने छ । यो भन्दा खुसी तपाईं अरु सोध्न सक्नुहुँदैन’ ।‘रिकी पोन्टिङ जस्तो लेजेन्ड्बाट सिक्न पाउनु साँच्चीकै यो एक राम्रो मौका हो । उनी वास्तवमै एक उत्कृष्ट, नम्र र राम्रो मान्छे हुन् । मलाई देखेर पोन्टिङ अत्यन्त खुसी भए । उनलाई भेट्ने बितिक्कै राम्रो क्षण थियो । रमाईलो किसिमको व्यक्ति उहाँले वास्तवमै सबैको ख्याल राख्नुहुन्छ । त्यसैले अति राम्रो लाग्छ’, सन्दीपले भने ।
सन्दीप लगातार तेस्रो सिजन दिल्ली क्यापिटल्सबाट आइपिएल खेलिरहेका छन् । जारी सिजनमा सन्दीपको टोली दिल्लीले आफ्नो पहिलो खेलमा किंग्स इलेभेन पञ्जाबलाई सुपर ओभरमा हराएको थियो । सन्दीप भने पञ्जाबविरुद्ध बेन्चमा बसेका थिए । दिल्लीले दोस्रो खेलमा शुक्रबार चेन्नई सुपर किंग्ससँग खेल्ने छ । सन् २०१८ मा ३२ लाख नेपाली रुपैयाँमा अनुबन्ध भएका सन्दीपले त्यसवर्ष तीन खेल मात्र खेल्ने मौका पाएका थिए । तीन खेलमा पाँच विकेट लिएका थिए । सन्दीपले सन् २०१९ मा ६ खेलमा आठ विकेट लिएका थिएका थिए ।
यसैगरी, इन्डियन प्रियिमर लिग (आइपिएल) २०२० को पाँचौ खेलमा मुम्बई इन्डिन्सले कोलकाता नाइट राइडर्सलाई ४९ रनले पराजित गरेको छ ।साविक विजेता मुम्बईको जारी आइपिएलमा दोस्रो खेलमा पहिलो जित हो । जितका लागि १ सय ९६ रनको विजयी लक्ष्य पछ्याएको कोलकाताले निर्धारित २० ओभरमा ९ विकेटको क्षतिमा १ सय ४६ रन मात्र बनाउन सक्यो । कोलकाता कुनैपनि ब्याट्सम्यानले ठूलो इनिङ खेल्न सकेनन् ।टे«न्ट बोल्टको तेस्रो ओभरको चौथो बलमा सुवमन गिल काइरान पोलार्डबाट ७ रनमा क्याच आउट भए । पाँचौ ओभरको पाँचौ बलमा जेम्स प्याटिन्सनले सुनिल नारायणलाई विकेटकिपर क्विन्टन डी ककबाट एक हातको उत्कृष्ट क्याच गराउँदै ९ रनमा पेभिलिएन फर्काए । ११ औं ओभरको पहिलो बलमा स्पिनर राहुल चहरले कप्तान दीनेश कात्र्तिकलाई ३० रनमा एललबिडब्लू आउट गरे । दीनेशले २३ बलमा ५ चौका प्रहार गरे ।
१२ औं ओभरको चौथो बलमा पोलार्डले हार्दिक पान्ड्याबाट नितेश राणालाई २४ रनमा क्याच आउट गराउँदा कोलकाता १००–५ को अवस्थामा पुगेको थियो । १६ औं ओभरको पहिलो बलमा जस्प्रित बुमराहले आन्द्रे रसेललाई ११ रनमा बोल्ड आउट गरेपछि कोलकाताको जित टाढिएका थियो । चौथो बलमा बुमराहले ओईन मोर्गनलाई डी ककबाट १६ रनमा क्याच आउट गराए । प्याट कमिन्सले १२ बलमा ४ छक्का र १ चौका सहित ३३ रन जोडेपनि जितको लागि पर्याप्त भएन ।
मुम्बईका जस्प्रित बुमराहले ४ ओभरमा ३२ रन खर्चेर २ विकेट लिए । ट्रेन्ट बोल्टले ४ ओभरमा १ मेडन सहित ३० रन खर्चेर २ विकेट लिए । जेम्श प्याटिसनले ४ ओभरमा २५ रन खर्चेर २ विकेट लिए । राहुल चहरले ४ ओभरमा २६ रन खर्चेर २ विकेट लिए । काइरन पोलार्डको नाममा एक विकेट रह्यो ।त्यसअघि आबूधाबीमा टस हारेर ब्याटिङको निम्तो पाएको मुम्बईले निर्धारित २० ओभरमा ५ विकेटको क्षतिमा १ सय ९५ रन बनाएको थियो । मुम्बईका कप्तान तथा ओपनर रोहित शर्माले सर्वाधिक ८० रनको योगदान दिए । रोहित युवा तीव्र गतिका बलर शिवम माभीको १८ औं ओभरको पाँचौ बलमा लो फुलटसबलाई ठूलो सट खेल्ने धुनमा लङअनमा प्याट कमिन्सको हातबाट क्याच आउट हुन पुगेपछि शतक सम्म पुग्न सकेनन् । रोहितले ५४ बलमा ३ चौका र ६ छक्का प्रहार गरे ।मुम्बईका ओपनर क्विन्टन डी ककलाई माभीले दोस्रो ओभरको दोस्रो बलमा निखिल नाइकबाट एक रनमा क्याच आउट गराए । दोस्रो विकेटका लागि रोहित शर्मा र सूर्यकुमार यादवले ९० रनको साझेदारी गर्दै बलियो योगफलको आधार तय गरेका थिए । सूर्यकुमार ११ औं ओभरको पाँचौ बलमा ४७ रनमा रन आउट भए । उनले २८ बलमा ६ चौका र १ छक्का प्रहार गरे ।
तेस्रो विकेटका लागि सौरभ तिवारी र रोहितले ४९ रनको साझेदारी गरेका थिए । स्पिनर सुनिल नारायणको १६ औं ओभरको पहिलो बलमा ठूलो सट खेल्ने धुनमा तिवारी प्याट कमिन्सबाट लङअफमा २१ रनमा समातिन पुगे । उनले १३ बलमा समान १ चौका र छक्का प्रहार गरे । हार्दिक पान्ड्या १३ बलमा २ चौका र १ छक्का सहित १८ रनमा हिट विकेटका रुपमा आउट भए । आन्द्रे रसेलको १९ औं ओभरको तेस्रो बलमा पान्ड्याको ब्याटले स्टम्प लागेपछि फेभिलिएन फर्किनु परेको थियो । काइरन पोलार्ड १३ र क्रुनाल पान्ड्या १ रनमा अविजित रहे ।कोलकाता स्पिनर सुनिल नारायणले ४ ओभरमा २२ रन खर्चेर १ विकेट लिए । तीव्र गतिका बलर प्याट कमिन्सले ३ ओभरमा ४९ रन खर्चिदा विकेट लिन सकेनन् । शिवम माभीले ४ ओभरमा १ मेडन सहित ३२ रन खर्चेर २ विकेट लिए । स्पिनर कुलदीप यादवले ४ ओभरमा ३९ रन खर्चिदा कुनै विकेट लिन सकेनन् । आन्द्रे रसेलले २ ओभरमा १७ रन खर्चेर १ विकेट लिए ।मुम्बई पहिलो खेलमा चेन्नई सुपर किंग्ससँग ५ विकेटले पराजित भएको थियो । तेस्रो खेलमा मुम्बईले सोमबार बेंगलोरसँग खेल्ने छ । कोलकाताले दोस्रो खेलमा शनिबार सनराइजर्स हैदराबादसँग खेल्ने छ ।

Leave a Reply

Your email address will not be published. Required fields are marked *