फिल्ममा अभिनय गर्दै आएका अभिनेत्रीहरु म्यूजिक भिडियोमा व्यस्त

काठमाडौं, ९ असोज । लकडाउन खुकुलो भएपछि फिल्ममा अभिनय गर्दै आएका अभिनेता तथा अभिनेत्रीहरु म्यूजिक भिडियोमा व्यस्त भएका छन । कोरोनाको संक्रमण रोकथामका लागि सरकारले लकडाउन गरेपछि करीब ५ महिना अधिकांश कलाकारको दैनिकी घरभित्रै वित्यो । कतिलाई पुस्तक त कतिलाई फिल्म दिन काट्ने साथी बन्यो । केही अभिनेत्रीले भान्सा छिरेर विभिन्न परिवार बनाउन सिके ।
तर, भयावह रुपमा फैलिएको संक्रमणका कारण राजधानीमा निषेधाज्ञा लागू भएपछि पुनः एक महिना घरभित्र सीमित भएका कलाकारहरु निषेधाज्ञा केही खुकुलो भएसँगै म्यूजिक भिडियोको छायांकनमा व्यस्त हुन थालेका छन् । अहिले उनीहरुलाई फिल्मबाट पनि प्रस्ताव आइरहेको छ । केहीले कोरोना महामारीपछि छायांकनमा जाने गरी फिल्म साइन समेत गरेका छन् । अभिनेत्री वर्षा सिवाकोटीलाई लकडाउन र निषेधाज्ञामा आधा दर्जन फिल्मबाट अफर आए । तर, उनलाई कुनै फिल्मको स्क्रिप्टले मन जितेन । अब उनी स्थिति सामान्य भएपछि पाइपलाइनमा रहेका ‘परदेशी २’, ‘सुदूर’ र ‘गोर्खा वारियर’ मा व्यस्त हुनेछिन् । ‘चालबाज’ को छायांकन सकाएर बसेकी उनले विकासराज आचार्यको ‘नाईं नभन्नू ल ६’ मा काम गर्ने पनि प्रवल सम्भावना छ । अभिनेत्री वर्षा बेला बखतमा पहिरनका कारण चर्चामा छाइरहेकी हुन्छिन् । उनलाई दर्शकहरुले साडीमा भने निकै कम देखेका छन् । हालै एक म्यूजिक भिडियोमा विवाहित महिलाको भूमिकामा देखिन उनले खैरो रंगको साडी, सिउँदोमा सिन्दूर र गलामा पोते लगाएकी थिइन् । साडीमा निकै खुलेकी छन्, उनी । अब वास्तविक रुपमा सिउँदोमा सिन्दूर लगाउने चाहिँ कहिले हो कुन्नी ?
यसैगरी, अभिनेत्री साम्राज्ञी आरएल शाह जति नै विवादित बने पनि उनको नेपाली फिल्ममा माग घटेको छैन । लकडाउनयता उनलाई अफर भएका र साइन गरेका फिल्मले पनि यो कुरा प्रमाणित गर्छ । ‘मारुनी र रातो टीका निधारमा’ को असफलतापछि निराश भएकी उनको पाइपलाइनमा अहिले तीन फिल्म छन् र तिनै फिल्ममा महंगो पारिश्रमिक बुझेकी छन् । ‘रातो टीका निधारमा’ गर्नुभन्दा अगाडि नै साम्राज्ञीले १६ लाख पारिश्रमिकमा निर्देशक हेमराज विसीको फिल्म साइन गरेकी थिइन् । यसमा उनले अभिनेता प्रदीप खड्कासँग रोमान्स गर्दैछिन् । निर्देशक विसी कोरोना महामारी पूर्ण रुपमा अन्त्य भएपछि फिल्मको छायांकन थाल्ने सोचमा छन् । लकडाउन खुकुलो भएपछि साम्राज्ञीले निर्देशक प्रवेश पौडेलको नयाँ फिल्म साइन गरिन् । यही मंगलवार उनी अर्को एक फिल्ममा अनुबन्ध भएकी छन् । रमेश एम.के पौडेलले निर्देशन गर्ने फिल्म ‘रेड वाइन’ मा उनले अभिनेता पल शाहसँग रोमान्स गर्दैछिन् । यो फिल्ममा उनले १२ लाखभन्दा बढी पारिश्रमिक बुझेको जानकारी प्राप्त छ । यस्तै, साम्राज्ञीले ‘प्रेमगीत’ सिरिज निर्माण गर्दै आएको आशुसेन फिल्मस्को नयाँ फिल्म ‘हुतुतु’ मा पनि काम गर्ने सम्भावना प्रवल छ ।‘रातो टीका निधारमा’ पछि झण्डै ६ महिना उनी कुनै फिल्ममा आबद्ध भइनन् । तर, अहिले लगातार फिल्म साइन गर्नुलाई धेरैले विभिन्न कोणबाट अर्थ्याएका छन् । पछिल्ला फिल्मको असफलता र एकपछि अर्को विवादका कारण उनको करिअर सकिएको कतिपयको टिप्पणी थियो । यसको जवाफकै खातिर उनले लगातार फिल्म साइन गरेको हुनसक्ने एकथरीले आँकलन गरेका छन् ।तर, आफ्ना आलोचकलाई जवाफ दिन उनले हतारमा फिल्म साइन गरेकी हुन् भने भोलीका दिनमा त्यसको परिणाम उनको करिअरका लागि घातक सावित हुनसक्छ । किनकि, कलाकार भएपछि फिल्मको कन्टेन्ट र आफ्नो भूमिकामा ध्यान दिनुपर्छ । पब्लिक फिगर भएपछि आलोचनालाई सामान्य रुपमा लिनसक्नु पर्छ । यसका लागि करिअर नै दाउमा लगाउनु राम्रो होइन । हतारको निर्णयले फुर्सदमा पछुताएका कलाकार नेपाली फिल्म क्षेत्रमा धेरै छन् । साम्राज्ञीले पनि केही फिल्मबाट यो भोगिसकेकी छन् । उनले लकडाउनको समयमा सामाजिक सञ्जालमा आफ्ना प्रशंसकको जवाफ दिने क्रममा अब वर्षमा १ वा २ वटा फिल्ममा मात्र काम गर्ने बताएकी थिइन् । तर, अहिले भकाभक फिल्म साइन गर्नुले उनी आफ्नो अडानमा बस्न नसकेको देखिन्छ । ‘ड्रिम्स र ए मेरो हजुर २’ को सफलतापछि उनलाई आफ्नो काँधमा बोकेर फिल्म सफल बनाउन सक्ने अभिनेत्रीको रुपमा चित्रित गरिएको थियो । तर, यसपछि उनले जति पनि फिल्ममा काम गरिन्, कुनैले हिटको सुख दिन सकेनन् । त्यसमाथि श्रृंखलाबद्ध विवादले उनको करिअरमा ठूलो असर ग¥यो । यद्यपि, उनीप्रति निर्माता तथा निर्देशकको विश्वासमा भने कमी आएको देखिन्न ।

Leave a Reply

Your email address will not be published. Required fields are marked *