प्रेम सम्बन्धको प्रश्न आउने गरेकोप्रति करिश्माको गुनासो


काठमाण्डौ,२९ भदौ । करीब तीन दशकभन्दा लामो समय फिल्म क्षेत्रमा बेथित गरिसकेकी अभिनेत्री करिश्मा मानन्धरले केही वर्षयता अध्ययनका कारण अभिनयबाट दुरी बनाएकी छन् । पछिल्लो पटक फिल्म ‘जात्रै जात्रा’ को ‘माया पिरिम’ बोलको गीतमा देखिएकी उनले राजनीतिमा पनि आफ्नो उपस्थिति जनाइसकेकी छन् । तर, फिल्म अभिनयमा झैँ उनको राजनीति करिअर भने सुखद बन्न सकेन । फिल्म ‘सन्तान’ बाट अभिनेत्रीको रुपमा डेब्यू गरेकी करिश्माको १८ वर्षको उमेरमा निर्माता विनोद मानन्धरसँग विवाह भएको थियो । बैबाहिक जीवनमा बाँधिएपछि उनको फिल्म करिअरले गति लिएको थियो । फिल्म अभिनयमा सक्रिय रहँदा उनको नाम विभिन्न व्यक्तिसँग जोडियो । एक छोरीकी आमा भइसकेकी करिश्मालाई तिनै व्यक्तिसँग जोडेर आजका दिनमा पनि प्रश्न गर्ने गरिन्छ । यो उमेरमा पनि आफूलाई अन्तर्वार्तामा प्रेम सम्बन्धको प्रश्न आउने गरेकोप्रति उनले गुनासो पोखेकी छन् । उनले फेसबुकमा लेखेकी छन्, ‘एउटा महिला कलाकार भएको नाताले मैले घरीघरी भोग्नु परेको एउटा बिषय के हो भने तपाईं फलानोसँग प्रेम सम्बन्धमा हुनुहुन्थ्यो रे ! म जुन क्षेत्रमा काम गर्छु त्यहाँ विभिन्न मानिसहरुसँग संगत हुन्छ, कतिसँग नजिक पनि भइन्छ, यो उमेरसम्म आउपुग्दा पनि अन्तर्वार्ताहरुमा त्यो एउटा प्रश्न जरुर आउँछ ।’
अभिनेत्री करिश्माले प्रश्न गर्दै अगाडि लेखेकी छन्, ‘म एउटा विवाहित महिला हुँ, परिवारमा बस्छु, बिहे गर्ने उमेरको छोरी छ, अब यस्तो प्रश्नको के जवाफ दिउँ ?’ आफूसँग प्रेम सम्बन्ध रहेको भनिएका पुरुषलाई भने यो प्रश्न कहिल्यै नगरिने उनी बताउँछिन् । उनले आफू महिला भनेर हेपेको त होइन भनेर प्रश्न पनि गरेकी छन् । आफ्नो श्रीमान र परिवारको इज्जत गर्न उनको आग्रह छ । ‘के दर्शकहरुलाई यस्तो प्रश्नको जवाफ सुनेर रमाइलो हुन्छ होला र ?’ उनले अगाडि लेखेकी छन्, ‘के बुझौं भने अहिलेको दर्शक स्रोता धेरै स्मार्ट हुनुहुन्छ सबै कुरा बुझ्नु हुन्छ ।’ करिश्माको यो स्टाटसबाट बुझ्न सकिन्छ कि उनी अन्तर्वार्तामा सोधिने प्रेम सम्बन्धको प्रश्नले दिक्क भएकी छन् । यसप्रकारका प्रश्नले आफ्नो परिवारमा समेत नराम्रो असर पर्ने गरेको उनको आशय छ ।

Leave a Reply

Your email address will not be published. Required fields are marked *