नेताहरुका विरुद्ध भइरहेको दुष्प्रचार बन्द गर्न आग्रह

काठमाडौँ, ९ साउन । पार्टी नेताहरुका विरुद्ध भइरहेको दुष्प्रचार बन्द गर्न नेपाल कम्युनिष्ट पार्टी (नेकपा) का अध्यक्ष प्रचण्डको सचिवालयले आग्रह गरेको छ । पछिल्ला दिनमा नेकपाको आन्तरिक वैचारिक बहसका विषयलाई लिएर भइरहेको गलत प्रचार तथ्यमा आधारित नरहेको पनि सचिवालयले स्पष्ट पारेको छ । अध्यक्ष प्रचण्डका प्रेस संयोजक विष्णु सापकोटाले बिहीबार ‘प्रेस नोट’ जारी गरी केही दिनयता पार्टीका स्थायी समिति सदस्य जनार्दन शर्माका सम्बन्धमा विभिन्न माध्यमबाट प्रकाशित÷प्रसारित समाचारप्रति ध्यानाकर्षण भएको जनाएका छन । पछिल्लो समय नेता शर्माले पार्टीलाई वैचारिक तथा साङ्गठानिक रुपमा थप एकताबद्ध बनाउन भूमिका निर्वाह गर्दै आएका छन ।
“आन्तरिक वैचारिक बहस एक जीवन्त पार्टीका विशेषताहरु हुन्, तिनै बहसका सम्बन्धमा मिडियामार्फत नेतामाथि लगाइने आरोप र दुष्प्रचार निन्दनीय छ”, सापकोटाद्वारा जारी प्रेस नोटमा भनिएको छ । पार्टी एकतादेखि आजसम्मको काममा नेता शर्माले अध्यक्ष प्रचण्डलाई सहयोग गर्दै आएको उल्लेख गर्दै अध्यक्ष प्रचण्डकोे सचिवालयले अहिलेको पार्टीभित्रको आन्तरिक बहसमा पनि उनि पार्टी एकताका पक्षमा लागेको प्रष्ट पारेको छ ।
गत असारमा बसेको नेकपाको स्थायी कमिटी बैठकमा नेता शर्माले एकताका लागी सबैले आआफ्नो अहम् छाडेर रुपान्तरित हुन जरुरी रहेको धारणा राखेका थिए । आफ्ना कमीकमजोरी स्वीकार्न, आफैँलाई सच्चाउने, छलफल र बहस गर्दै नयाँ निष्कर्षमा पुग्ने विषयमा रुचीपूर्वक लाग्नुपर्नेमा जोड दिँदै उनले रुपान्तरणका साथ एकताबद्ध हुनुमै राष्ट्रको भविश्य रहेको बताएका थिए ।

Leave a Reply

Your email address will not be published. Required fields are marked *