सिफारिस समितिद्वारा ६१ जनाको नाम सार्वजनिक

काठमाडौँ, २ मंसिर । सिफारिस समितिले ६१ जनाको नाम सार्वजनिक गरेको छ ।
सत्य निरुपण तथा मेलमिलाप र वेपत्ता पारिएका व्यक्तिको छानबिन आयोगका पदाधिकारीका लागि नयाँ तथा पूर्व पदाधिकारी गरी ६१ जना इच्छुकको नाम सिफारिस समितिले सार्वजनिक गरेको हो । आवेदन दिई योग्यता पुगेका ५०, विभिन्न संस्थाबाट सिफारिसमा परेका चार र राजनीतिक सहमतिपछि समितिले थप गरेका समेत ६१ जनाको नाम सार्वजनिक गरिएको हो । सिफारिस समितिको आइतबार बसेको बैठकले अध्यक्ष तथा सदस्यको नाम सार्वजनिक गर्ने निर्णय गरेअनुसार सोमबार नाम सार्वजनिक गरिएको समितिका सदस्य शर्मिला कार्कीले जानकारी दिईन । सत्य निरुपण तथा मेलमिलापमा अध्यक्ष हुन चाहनेमा कमलनारायण दास र मधुप्रसाद रेग्मी रहेका छन भने दुई आयोगका अध्यक्ष हुन चाहनेमा युवराज सुवेदीको नाम रहेको छ । त्यसैगरी दुवै आयोगका अध्यक्ष तथा सदस्य बन्ने इच्छुकमा दशजनाको नाम रहेको छ । ती नामहरुमा सलाहुद्दीन अख्तर सिद्दिकी, दुर्गाबन्दु पोखरेल, दुमनसिंह थापा क्षेत्री, रेवन्तबहादुर कुँवर, अली अकवर मिकरानी, ताराबहादुर न्यौपाने,गोपीचन्द्र भटट्राई, सीताप्रसाद पोखरेल, गोविन्द गौतम र अरबिन्दकुमार सिंहको नाम इच्छुकमा परेको छ । सिफारिस समितिले सातजना व्यक्तिहरुको नाम सिफारिस गरेको छ । त्यसमध्ये पाँचजना पूर्वपदाधिकारी नै रहेका छन । बेपत्ता पारिएका व्यक्तिको छानबिन आयोगका पूर्वअध्यक्ष लोकेन्द्र मल्लिक, सदस्य आइबहादुर गुरुङ,नरकुमारी गुरुङको नाम रहेको छ । सिफारिस समितिले सत्य निरुपण तथा मेलमिलाप आयोगका पूर्वपदाधिकारी मञ्चला झा र श्रीकृष्ण सुवेदीको नाम सिफारिस गरेको छ । त्यस्तै, सत्य निरुपण तथा मेलमिलाप आयोगका लागि नयाँ अध्यक्षमा गणेशदत्त भट्ट र सदस्य डा गंगाधर अधिकारीको नाम सिफारिस गरेको छ । द्वन्द्वपीडित राष्ट्रिय समाजले सत्य निरुपण तथा मेलमिलाप आयोगका पूर्वसदस्य डा माधवी भट्ट पराजुली, नेपाल निवृत शिक्षक समाजले चूडामणि शर्मा, द्वन्द्वपीडित समितिले लक्ष्मी पोखरेल र नेपाल मानव अधिकार सङ्गठनले अध्यक्ष तथा सदस्यमा विजुलकुमार विश्वकर्माको नाम सिफारिस गरेको छ । सिफारिस भएका अध्यक्ष तथा सदस्यप्रति उजुरी गर्नुपरेमा पाँच दिनभित्र उजुरी दिनसमेत समितिले समय दिएको छ । दुवै आयोगमा पदाधिकारीमा चाहना राख्ने पुरानै नामका व्यक्तिले पनि फारम भरेका छन् भने व्यक्ति आफैँले र विभिन्न संस्थामा सिफारिक गरेका तथा सिफारिस समितिले सिफारिश गरेका नामहरु छन् । पूर्वप्रधानन्यायाधीश ओमप्रकाश मिश्रको संयोजकत्वमा गत चैतमा सरकारले दुई आयोगमा पदाधिकारी नियुक्तिका लागि सिफारिस समिति गठन गरेको थियो । दुवै आयोग पदाधिकारीविहीन हुँदा सङ्क्रमणकालीन न्यायमा ढिलाइ भइरहेको छ ।
यता, सिफारिस समितिलेसार्वजनिक गरिएकोमध्ये एक नाम दुर्घटनामा हराइरहेका एक वरिष्ठ अधिवक्ताको समेत छ । सार्वजनिक भएको सूचीको ४३ औँ नम्बरमा वरिष्ठ अधिवक्ता अरविन्दकुमार सिंहको नाम छ । साउन २४ गते धादिङको सालाङघाटमा भएको सवारी दुर्घटना परेर सिंह हराइरहेका छन् । परिवारका सदस्यले खोजीको सार्वजनिक सूचना जारी गरेका छन् । उनलाई नभेटिएपछि ’न सास न लास’को अवस्थामा छ परिवार । हराइरहेका भनिएका व्यक्तिको नाम सत्य निरुपण तथा मेलमिलाप आयोगको अध्यक्ष वा सदस्यको दाबेदारका रुपमा सार्वजनिक हुँदा धेरैले अचम्म मानेका छन् ।

Leave a Reply

Your email address will not be published. Required fields are marked *