सडक दुर्घटनामा १० जनाको मृत्यु

 

ओखलढुङ्गा, १८ चैत । ओखलढुङ्गा र बर्दियामा भएको सडक दुर्घटनामापरी १० जनाको मृत्यु भएको छ । ओखलढुंगाको मानेभञ्ज्याङ गाउँपालिका–६ डडुवाखोलास्थित सिद्धिचरण राजमार्गमा आइतबार जीप दुर्घटना हुँदा ७ जनाको मृत्यु भएको छ । दुर्घटनामा दुई जना गम्भीर घाइते भएका छन्। प्रहरीका अनुसार मृत्यु हुनेमा ताप्लेजुङ फक्तालुङ गाउँपालिका–७ ओलाङचुङगोलाका ५५ वर्षीय मिङ्मा शेर्पा, ४५ वर्षीय साङ्गेल शेर्पा, काठमाडौं बौद्धका २४ वर्षीय नुर्बु शेर्पा, ३५ वर्षीय ङवाङ शेर्पा, डोमा शेर्पा, नुमा शेर्पा छन् । उनीहरूको घटनास्थलमै मृत्यु भएको १ नम्बर प्रदेश प्रहरीले जनाएको छ । काठमाडौं नयाँबस्तीका ४५ वर्षीय कुङसिङे शेर्पाको उपचारको क्रममा ग्राण्डी अस्पतालमा मृत्यु भएको प्रहरीले जनाएको छ । सोलुखुम्बुबाट काठमाडौं जाँदै गरेको बा.१६च. २२०७ नम्बरको जीप दिउँसो पौने १२ बजे राजमार्गबाट दुई सय मिटर तल खसेको थियो । घाइतेमध्ये चालक कृष्ण श्रेष्ठ र मिङमा शेर्पाको ग्राण्डी अस्पतालमा उपचार भइरहेको प्रहरीले जनाएको छ । घाइते सबैलाई सिम्रिक एयरको हेलिकप्टरमार्फत काठमाडौं ल्याइएकोमा एकको मृत्यु भएको प्रहरीले जनाएको छ । घटनास्थलमै मृत्यु भएका ६ जनाको शव पोस्टमार्टमका लागि जिल्ला अस्पताल रुम्जाटार लगिएको १ नम्बर प्रदेश प्रहरीका प्रवक्ता डिएसपी सिद्धराज न्यौपानेले जानकरी दिएका छन ।
यसैगरी बर्दियाको बारबर्दिया नगरपालिकामा मोटरसाइकल दुर्घटना हुँदा तीनको मृत्यु भएको छ । नगरपालिका–९ स्थित बनगाईमा भएको दुघर्टनामा घाइते भएका मधुवन नगरपालिका–१ का २१ वर्षीय सुरज चौधरी, १४ वर्षीया कृष्णा चौधरी र २३ वर्षीय खगेन्द्र बस्नेतको उपचारका क्रममा कोहलपुर मेडिकल कलेजमा मृत्यु भएको हो । सुरज चौधरीले चलाएको भे८प ६९६८ नम्बरको मोटरसाइकल र खगेन्द्र बस्नेतले चलाएको बा ९१ प ९३७७ नम्बरको मोटरसाइकल आपसमा ठोक्किएर दुर्घटना भएको जिल्ला प्रहरी बर्दियाले जनाएकोे छ । तीव्रगतिका कारण मोटरसाइकल ठोक्किएको प्रहरीको प्रारम्भिक अनुसन्धानबाट खुलेको छ भने थप अनुसन्धान भइरहेको प्रहरीले जनाएको छ ।

Leave a Reply

Your email address will not be published. Required fields are marked *